عهدي بها قدام تلبس عبايهـ
وانا بعد قبل ألبس شماغي وعقال
طفلين نتهجى حروف القرايهـ
اللهـ يامجمل سواليف الاطفال
كانت لنا في كل شارع حكايهـ
وكنا نقول علوم ماهيب تنقال
وكنت اتقاسم ما معاها معايهـ
من عسكريم التوت للعلك ابو ريال
وكانت بعكسي شاطره بالقرايهـ
تقرأ جزء عم وطه والانفال
وانا لك الله من مواري غبايهـ
مدري ابو نقطه هو ذال او دال
وكانت لابويه تشتكي من شقايهـ
وتعلمه كيف اربط الباب بحبال
ياما على ظهري كسر من عصايهـ
يقول لي خلك وانا ابوك رجال
وامي تقول ادع لولدك بالهدايهـ
خوفي يصيبه كثرة الضرب بهبال
لا شفتها مع اول الدرب جايهـ
مدري انا اللي ملت ولا الوطا مال
احس قلبي يرتجف في حشايهـ
ماكنه الا الضيف لا هز فنجال
ياما عن السعلي تخبت ورايهـ
لاخوفوها فيه ثم شافت ظلال
تقول خلك يامحمد معايهـ
وأستانس اللعب عندها دور الابطال
وآغار عليها حتى من عيون اصدقايهـ
لاطالعوها قلت تكفون ياعيال
ليست هناك تعليقات:
إرسال تعليق